የሌባ አይነ ደረቅ! መልሶ ልብ ያደርቅ!!!!

ውድ ምእመናን ሆይ! እንደምን ከረማችሁ? የዳላስ ቅዱስ ሚካኤል ቤተክርስትያን ሲመሰረት የነበራችሁ ሰዎች እንደምታስታውሱት የኢትዮጵያ ኦርቶዶክስ ቤተክርስቲያን መንበሩ አዲስ አበባ ላይ ሆኖ በአንድ ፓትሪያርክ ስር ይተዳደር ነበር። ዛሬ የምናየው ክፍፍል ባልነበረበት ሰዓት ላይ የተቆረቆረው ደብራችን በመተዳደርያው ደንብ ( By Law) ላይ ቁልጭ ብሎ እንደተጻፈው፦
1ኛ፦ እምነታችን በኢትዮጵያ ኦርቶዶክስ ተዋህዶ እምነት መሰረት የሚከናወን ሲሆን

2ኛ፦ አስተዳደሩ ደግሞ ከአባል ምእመናን ውስጥ በሚመረጡ የቦርድ አባላት እንደሚፈጸም ይደነግጋል።



ይህ ደብር ራሱን ችሎ የቆመ ሲሆን፤ ከቤተ ክህነት አስተዳደር ውጭ የተደራጀ ቤተክርስትያን ነው። ቅድስት ቤተክርስትያናችን ዛሬ ባለችበት ፈታኝ ዘመን ደግሞ ከእህት ቤተከርስትያናት ጋር የገለልተኝነት አቋም ይዘን እንገኛለን። ይህንን አቋማችንን ለውጠው በአባ ፓውሎስ አስተዳደር ስር ሊያካትቱን የሚታገሉን፦
1 ማህበረ ቅዱሳን

2 የምእመናንና የካህናት ጉባኤ የሚባል ድርጅት

3 የወያኔ ካድሬዎችና ደጋፊዎች በተለያየ ዘዴ ምእመኑንና ቤተክርስትያናችንን እየተፈታተኑት ይገኛል። ለምሳሌm:-
ሀ፦ አምስት ጊዜ ፍርድቤት ከሰዋል። ከነዚህም ሁለቱን ፍርድ ቤቱ ውድቅ ሲያደርገው፤ ሶስተኛው የተጭበረበረ ስለነበረ በራሳቸው ሰርዘዋል። አራተኛ ይግባኝ ብለው እየጠበቁ ሳለ፤አምስተኛውን ክስ ስማቸውንና ፍርድ ቤት ለውጠው ሰሞኑን ከሰዋል።

ለ፦ ማህበረ ቅዱሳን ቦርዱንና አስተዳደሩን በተቆጣጠሩበት ሰዓት ከ 1.2 ሚሊዮን እስከ 1.5 ሚሊዮን የነበረውን የቤተክርስትያን ካሽ (Cash) ወደ 800 መቶ ሽህ ብር አድርሰዉታል። በሟቹ በአቡነ ይስሃቅ ስም ተከፍቶ በነበረው የባንክ ሂሳብ ውስጥ 450 ሽህ ብር የት እንደደረሰ አይታወቅም።
አቶ አበራና ዶር ግርማ የቦርድ አባል ሆነው እንደተመረጡ፦

1ኛ፦ ቤተክርስቲያናችን የገንዘብ አያያዝና የሂሳብ አሰራር ችግር እንዳለበት ሲረዱ ይሄንኑ ጉዳይ ለቦርድና ለህዝብ አሳወቁ።

2ኛ፦ አመታዊ የሂሳብ ኦዲት ሲዘጋጅ በማህበረ ቅዱሳንና በአቶ ኪዳኔ ምስክር አማካኝነት ወጭ የሆነውና ደርሰኝ ያልተገኘለት 139 ሽህ ብር ቤተክርስቲያኑ ላይ ምንም የሚያደርሰው ጉዳት ስለሌለ እንደጠፋ ገንዘብ እንዳይቆጠርና የኦዲት ሪፖርት ዉስጥ መግባት የለበትም በማለት የቦርዱ አባላት ያዘጋጁትን ሰነድ ስለተቃወሙ፦
እነዚህ ግለሰቦች ትክከለኛ ስራ ለመስራት ባደረጉት ጥረት በጥቅም የተሳሰረ ቀለበት ውስጥ ያሉ ግብረአበሮች ተባብረው በሃሰት ብር ሰርቀዋል በማለት ወንጅለው ከቦርድ እንዲወገዱ ለማድረግ የተሰራውን ሴራ ሁላችሁም አትዘነጉትም።

“ሌባ እናት የገዛ ልጇን አታምንም እንዲሉ “ እኛ መዝረፍ ካልቻልን ሌላውን ሰው ሁሉ ሌባ ነው እያልን እርስ በርሱ እናበጣብጥ ብለው የጠነሰሱት ውንጀላ ነበር። ሆኖም አልተሳካላቸውም።

የአስተዳደር ቦርድ የክህነት ማዕረግ አይሰጥም። ለዚህም ስልጣን የለውም። ሆኖም ግን ቀሳውስትን ይቀጥራል። ስራ ላይም ይመድባል። ይቆጣጠራል። ደመወዝ ይከፍላል። ሲያጠፉም አስተዳደራዊ ውሳኔ ይሰጣል። ሁሉም ካህናት ሲቀጠሩ ይህንን አሰራር እያወቁ ወደው ተስማምተው ተቀጥረዋል። ይህም በመተዳደርያ ደንቡ ውስጥ (By Law) በግልጽ የተቀመጠ ነው። ቦርድ የምንመርጠውም ይህን የመሰለ አስተዳደራዊ ስራዎችን አንዲሰራ ነው።
ውድ ምእመናን ሆይ!

ሀቁ ይህ መሆኑን ተገንዝባችሁ ይህች ቤተክርስቲያን ለልጆቻችን እንጅ ለሌላ ልትሆን እንደማትችል ከላይ ስማቸው ለተጠቀሰው ድርጅቶችና ለአባሎቻቸው “የሌባ አይነ ደረቅ መልሶ ለብ ያደርቅ” ብላችሁ የማያወላውል ማስጠንቀቂያ እንድትለግሷቸው እየጠየቅን፤ ሁላችንም በጸሎት እግዚአብሔርን እንድንለምን፤ የስነስርአት ጉድለትን በሕግ እንድናስከብር፤ ቤተክርስቲያናችንን ዘውትር ሌትም ሆነ ቀን በተጠንቀቅ እንድንጠብቅ፤ ቢጽ ሃሳውያንን እንደተኩላ ከተሰገሰጉበት ከመሃላችን ነቅሰን እንድናወጣ እግዚአብሔር በቸርነቱ ይርዳን!! ቅዱስ ሚካኤል ቤቱን ለማፍረስ ታጥቀው የተነሱትን ሴረኞችና ዘራፊዎች በሰይፉ ይጎብኛቸው።

ቸሩ ፈጣሪያችን ለሁላችንም የሚያስተውል አእምሮ ይስጠን! አሜን!!